सातासमुद्रापार
प्रिय आजी, किती छान, सुंदर सजवलंस गं तू तुझं नवीन घर! नक्षीकाम केलेला हा दर्शनी दरवाजा खरंच मोहक वाटतो अन् खिडक्यांची तावदानंसुद्धा अप्रतिमच! तुझ्या घराच्या या उंचच उंच भिंती आणि त्यावर साधलेली आकर्षक रंगसंगती कुणालाही वेड लावणारं असं वाटतं. प्रशस्त हॉलमधील ते देखणे झुंबर तसेच जमिनीवर अंथरलेले हे सुंदर गालीचे मनापासून आवडलेत आजी मला!
आवारातील बाग बघतच रहाविशी वाटते इतकी उत्तमप्रकारे आजी तू 'मेन्टेन' केलीस! आणि हो, मध्यभागी बसवलेली कारंजी संध्याकाळी या परिसराची शोभा वाढवतात. पण एक सांगू आजी तू एवढ्या कष्टानं, जिकिरीनं बांधलेलं हे घर बघायला पप्पा खरंच येणार आहेत का? बरं एवढं मोठं घर बघायला आले तर ते राहणार तरी किती दिवस ?
आजी थोडं मनातलं सांगू माझ्या... अगं मला खरंच इथे राहायला आवडलं असतं तुझ्या सहवासात. तुझं हे नवीन घर मला मनापासून आवडले. पण मम्मीनं माझी 'अँडमिशन' केली ना....-तिकडे यूएसला! अन् तुला पण माहिती आहे मम्मीनं एकदा ठरवलं की ते पप्पासुध्दा बदलू शकत नाही. मम्मीचा निर्णय म्हणजे जणू काळ्या दगडावरची रेघच! ती कुठल्याच 'डस्टरनं' पुसता यायची नाही! मग डोळ्यातून येणाऱ्या अश्रुंना पुसता पुसता आपणच स्वतःला सावरायचं असतं. ते शिकलो मी सरावानं, तू मनाला लावून घेऊ नकोस आजी!
