सुगावा... मनोगत

 

सुगावा... The Clue!
                         मनोगत
        सर्वसामान्य माणसाला रोजच कुठल्या ना कुठल्या बऱ्यावाईट  प्रसंगांना सामोरं जावं लागतं. कधी ते प्रसंग खाजगी आयुष्यातले असतात तर कधी ते नोकरी करत असताना किंवा कामधंदा करताना येत असतात. सार्वजनिक ठिकाणी वावरताना एखादा असा प्रसंग आयुष्यात येतो, ज्याने मती गुंग होऊन जाते! मग नकळतपणे तो त्यात गुंतत जातो. अगदी अनपेक्षितपणे त्याच्या डोळ्यासमोर एखादी अशी घटना घडते, ज्यात तो बेमालूमपणे गुरफटला जातो आणि होत्याचं नव्हतं होण्याची पाळीही त्याच्यावर येऊन ठेपते. कितीही प्रयत्न केले तरी त्यातून त्याची सुटका होत नाही. मग नाईलाजाने या सामान्य माणसावर कमालीचा मनस्ताप सहन करण्याची वेळ येते!
        आणि नंतर सुरू होतो पोलिसांच्या तपासाचा ससेमिरा, कोर्टाच्या तारखांच्या फेऱ्या! काहीही संबंध नसताना विनाकारण आलेल्या अशा प्रसंगाला सामोरं जाताना त्याच्यासोबतच त्याच्या कुटुंबीयांना देखील त्रास सहन करावा लागतो. एखाद्या वेळी कुठल्यातरी अज्ञात वाहनाची धडक लागून या सामान्य माणसाचा जीव सुद्धा संकटात सापडतो. तर त्याची कुठलीही चूक नसताना, सर्व नियम धाब्यावर बसवून अचानक त्याच्या अंगावर आलेल्या एखाद्या वाहनामुळे कायमचे अपंगत्वही येऊ शकते.
         आपण कितीही सावध असलो तरी अशाप्रकारचे प्रसंग आपल्या डोळ्यासमोर घडत असतात आणि 'हुश्श ... थोडक्यात बचावलो' असं म्हणण्याची पाळीही आपल्यावर येते! अशावेळी अज्ञात गुन्हेगार राजरोसपणे मोकाट फिरत असतात. मात्र सर्वसामान्य माणसं सतत तणावात जगत असतात. कधीकधी सामान्य माणसाला अशाप्रकारच्या आकस्मिक प्रसंगाची जबर किंमतही चुकवावी लागते!
        "सुगावा... The Clue!" या माझ्या दुसऱ्या रहस्यमय कादंबरीत रोजचे जीवन जगत असताना आयुष्यात येणाऱ्या अनपेक्षित प्रसंगांना सामान्य माणसाला कुठल्या दिव्यांना सामोरं जावं लागतं? अचानक उदभवलेल्या संकटांना तो कशाप्रकारे तोंड देतो? त्यातून सुटका करून घेण्यासाठी त्याची जीवघेणी धडपड यशस्वी होते का? अज्ञात आरोपीचा माग घेण्यासाठी आणि त्याच्यापर्यंत पोहचण्यासाठी पोलीस कशाप्रकारे शक्कल लढवतात? त्यांना कोणाची मदत होते? ते काय काय योजना आखतात? शेवटी गुन्हेगार हुलकावणी देण्यात यशस्वी होतात की ते पोलिसांच्या जाळ्यात अडकतात? या सर्व प्रश्नांची उत्तरे, रहस्यांचा उलगडा सहज सोप्या संवादशैलीत या कादंबरीत मांडण्याचा प्रयत्न केला आहे. गुन्हेगारांच्या निरनिराळ्या क्लृप्त्या, त्यावर मात करणारे पोलिसांचे अफलातून तपासकार्य, त्यातून निर्माण होणारी कमालीची गुंतागुंत आणि मग हळूहळू उलगडत जाणारे अचंबित करणारे रहस्य हे सगळं वाचताना उत्कंठा शिगेला पोहचल्याशिवाय राहत नाही. या कादंबरीतील क्षणाक्षणाला धक्के देणारे अनेक प्रसंग वाचकांना खिळवून ठेवण्यास भाग पाडतात. त्यामुळे 'सुगावा... The Clue!' निश्चितच वाचकप्रिय ठरणार याची खात्री आहे.
          यापूर्वी प्रकाशित झालेल्या 'हॉटेल हवेली' या माझ्या पहिल्याच रहस्यमय कादंबरीला रसिक वाचकांचा भरघोस प्रतिसाद लाभला. त्यासाठी वाचकांना मनापासून धन्यवाद देतो. तसेच याठिकाणी मी नम्रतापूर्वक नमूद करतो, विख्यात साहित्यिक आणि संशोधक, प्राकृत भाषा अभ्यासक संजय सोनवणी यांनी 'हॉटेल हवेली'साठी लिहिलेल्या प्रस्तावनेमुळेच मला 'सुगावा... The Clue' ही रहस्यमय कादंबरी लिहिण्याची प्रेरणा मिळाली आणि मग झपाटल्यासारखा लिहित गेलो.
           नागपूर हिवाळी अधिवेशनाच्या काळात विविध मागण्यासाठी  निघालेले मोर्चे, मग जोरदार घोषणाबाजी सुरू असतानाच अचानक अनियंत्रित झालेल्या एका मोर्चावर होणारा पोलिसांचा लाठीमार आणि त्या मोर्चाच्या धामधूमीचा फायदा घेऊन गुन्हेगारांनी बेमालुमपणे  पाडलेला भीषण खून! त्यानंतर घडणारे निरपराध माणसांचे अपहरण नाट्य, अनेक वेगवान घटना, गुन्हेगांराच्या कल्पना करू शकणार नाही अशा नवनवीन नामी युक्त्या मग त्यावर कुरघोडी करण्यासाठी पोलिसांच्या अफलातून तपासाचा थरार आणि उत्कंठा शिगेला पोहचल्यावर शेवटी उलगडत जाणारे खुनाचे रहस्य अशी एकंदरीत पार्श्वभूमी या कादंबरीला लाभली आहे.
          आता या शेवटपर्यंत खिळवून ठेवणाऱ्या 'सुगावा... The Clue' कादंबरीला पुण्यातील 'प्राजक्त प्रकाशन' या नामवंत संस्थेचे प्रकाशक जालिंदर चांदगुडे यांनी अत्यंत आकर्षक रीतीने पुस्तकरूप बहाल केले आहे.  'सुगावा... The Clue!'साठी प्रसिद्ध चित्रकार संतोष घोंगडे यांनी साजेसे मुखपृष्ठ रेखाटले आहे. तसेच आर्टिस्ट विलास भंडारी यांनी या कादंबरीसाठी सुंदर लेआऊट करून दिले आहे. या सर्वांचेच मन:पूर्वक आभार !

...विनोद श्रा. पंचभाई
भ्र. क्र.९९२३७९७७२५