पालखी माऊलीची

"पालखी माऊलीची "

पालखी निघाली माऊलीची
         वारकरी चालती पंढरीची वाट!
टाळ मृदंगासंगे निघाले शिस्तीत
       मागे पडला रम्य तो  दिवे घाट!

भान विसरोनी दिवस रात्र
शिथिल होईपर्यन्त गात्र न् गात्र!

पालथी घातली कितीक गावं अन् वने!
चालती एक दिलाने जिंकून सर्वांची मने!

काही पोहचले गड जेजूरीला
             पडण्या खंडोबाच्या पाया!
तर काही चालती संतांच्या संगे
          सोबतीला नित्य माऊलीराया!

 उत्साहाच्या भरात भाविकांनी
             सर केला उंच कडे पठार !
सगळे मिळून गर्जना करती
              जय मल्हार, जय मल्हार!

लाखोंच्या संख्येने जमले आता निरेच्या तिरी
भक्तिभावाने धुंद होती सगळे वारकरी!

पांडुरंगाची आस लागली प्रत्येकास सारखी
घेऊन निघाले उत्साहाने माऊलीची पालखी!

कधी एकदा पोहचू पंढरीला
                     मनी लागला ध्यास!
त्या विठुरायाच्या दर्शनासाठी
                   अडकला जसा श्वास !

आपसातील हेवेदावे येथे
                     खरंच किती नगण्य!
माऊलीच्या कृपेने होईल
                जीवन सगळ्यांचे धन्य!!

                    ..... विनोद श्रा. पंचभाई