गुरुपुष्यामृत योग ---- विशेषता आणि महत्त्व
आपली भारतीय संस्कृती ही विविधतेने नटलेली आहे. प्रत्येक राज्यासाठी करण्यात आलेल्या प्रांतवार भाषा रचना तसेच तेथील वेगवगळ्या रूढी परंपरा या त्या-त्या राज्यांचं वैशिष्ट्य मानलं गेलं आहे. आपल्या भारतीय संस्कृतीमध्ये निरनिराळ्या सणांना तसेच विविध प्रकारची व्रतवैकल्ये, नक्षत्रे, मुहूर्त यांना अनन्यसाधारण महत्त्व आहे.
आपल्याकडील ज्योतिष शास्त्रामध्ये विशिष्ट ग्रह, नक्षत्र, तिथी, महिना आणि सोमवारपासून रविवारपर्यंतचे वार या महत्त्वाच्या घटकांचा समावेश करण्यात आला आहे. "या घटकांचा प्रभाव आणि युती यांच्यामुळे मानवी जीवनात शुभ व अशुभ काळ निर्माण होत असतो. तसेच ग्रह, नक्षत्र, तिथी इत्यादी घटकांच्या मदतीनेच मानवाला इच्छित कार्यात यश प्राप्त होऊ शकते" असे ज्योतिष शास्त्रातील तज्ज्ञांचे मत आहे.
जर गुरूवारी पुष्य नक्षत्राचा दिवस आला, तर तो अत्यंत शुभ मानला जातो. हा दिवस व नक्षत्र यांच्या संयोगातून गुरूपुष्यामृत योग निर्माण होतो. कुठल्याही चांगल्या कार्यात जवळजवळ नव्व्यान्नव टक्के यशस्वी होण्यासाठी, त्या कार्याची सुरूवात या गुरुपुष्यामृताच्या दिवशी केली जाते. कारण सूर्यमालेतील सर्वात मोठा ग्रह गणल्या गेलेला "गुरू" हा ग्रह आपल्याकडे ज्ञान आणि यश प्राप्त करण्याचं प्रतीक मानल्या गेलं आहे!
म्हणूनच गुरूपुष्यामृत योग असलेल्या दिवशी उच्च शिक्षण किंवा तंत्रज्ञानाचं शिक्षण सुरू करणे अत्यंत लाभदायक ठरते. त्याचप्रमाणे विविध कला प्रकार, साहित्य, नाट्य, वाद्य तसेच निरनिराळ्या विषयातील संशोधनाचा प्रारंभ करणे या दिवशी शुभ मानले जाते. शैक्षणिक किंवा आध्यात्मिक गुरू यांच्याकडून मंत्र वा दीक्षा घेणे, विदेशवारी करणे, नवीन व्यवसायाची सुरूवात, धार्मिक कार्याचा प्रारंभ, नवीन वास्तू किंवा निवासस्थानात प्रवेश करणे गुरुपुष्यामृताच्या दिवशी आपल्या भारतीय संस्कृतीत अत्यंत शुभ मानले गेले आहे. गुरूपुष्यामृत योगाच्या काळात सोने, चांदी किंवा नवीन वाहन खरेदी केल्यास त्यापासून लाभ तर होतोच आणि ते चिरकाल टिकून राहते, असाही बरेच तज्ज्ञ सल्ला देतात. तसेच या दिवशी पिवळा पुष्कराज बोटाच्या अंगठीमध्ये धारण करणे हे सुध्दा अत्यंत फलदायी मानले गेले आहे.
सध्या सुरु असलेल्या २०१९ या सालात गुरूवार
दिनांक ६ जून रोजी गुरुपुष्यामृत योग नुकताच येऊन गेला. तसेच पुढील आठवड्यात दिनांक ४ जुलैच्या गुरूवारी या वर्षातील दुसरा गुरुपुष्यामृत योग येत आहे. त्याचा कालावधी ४ जुलैच्या सकाळी सहा वाजून आठ मिनिटांपासून ते ५ जुलैच्या पहाटे दोन वाजून एकोणतीस मिनिटांपर्यंत आहे. त्यामुळे या शुभ काळात आपण वर नमूद केल्याप्रमाणे गुरूपुष्यामृताचा नक्कीच लाभ घेऊ शकतो! तेव्हा शुभस्य शीघ्रम्!!
विनोद श्रा. पंचभाई
वारजे, पुणे
भ्र.९९२३७९७७२५
No comments:
Post a Comment