पुणे मेट्रो… उत्कंठा वाढवणारी दर्जेदार कादंबरी

 

    पुणे मेट्रो… उत्कंठा वाढवणारी दर्जेदार कादंबरी

       सकाळी पेपर हातात घेतला की, बातम्या दिसतात... प्रेम संबंधात आडकाठी ठरणाऱ्या पतीचा किंवा पत्नीचा खून, प्रेमाचा स्वीकार केला नाही म्हणून तरुणीवर ऍसिड हल्ला… प्रेयसीचा खून करून आत्महत्या, अशा कितीतरी दुर्दैवी घटना आपल्या समाजात घडताना आपण एवढ्यात सतत बघत असतो. प्रेमासाठी वाट्टेल ते करायची, अगदी समोरच्याचा जीव घेण्यापर्यंत मजल मारायची तयारी करणं आज अगदी सहज झालं आहे… दुर्दैवानं ही विकृती मोठ्या प्रमाणात फोफावत आहे! 

    

    प्रेम ही निखळ, निर्मळ, निस्वार्थ, उदात्त भावना आहे… त्यात स्वार्थाचा लवलेशही नसतो हेच आजकालची पिढी जणू विसरून गेली की काय अशी शंका घेण्यासारखी आजची परिस्थिती आहे! 

त्याच त्या बातम्या वाचत असताना, त्याच घटना किंवा दुर्दैवी प्रसंग ऐकत असताना… या सगळ्या निराशेच्या पार्श्वभूमीवर सकारात्मक संदेश देणारी एक सहजसुंदर साहित्यकृती हातात आली… ती म्हणजे ‘पुणे मेट्रो’ ही उत्कंठा वाढवणारी कादंबरी!

    

   आजकाल लोकांना मोबाईलवर बोलायला भरपूर वेळ असतो मात्र आपल्या जवळच्या लोकांना देखील आपुलकीने भेटून प्रेमाचे चार शब्द बोलायला अजिबात वेळ नसतो, हे दुर्दैवी वास्तव आहे! अशा वातावरणात लेखक सुनील पांडे यांची ‘पुणे मेट्रो’ ही वाचनीय कादंबरी हाती पडल्यावर गार वाऱ्याची छानशी झुळूक सर्वांगावरून गेल्यासारखं वाटलं … कारण ही दर्जेदार कादंबरी वाचताना ‘आता पुढे काय’ ही उत्सुकता पदोपदी जाणवत राहते! 

       आपण कुठलाही प्रवास करत असताना शेकडो, हजारो माणसं सतत दृष्टीस पडतात. सगळेच यंत्रवतपणे ये - जा करत असल्यामुळे त्यावेळी कोणाशी बोलण्याचा प्रश्नच उदभवत नाही. मात्र कधीकधी रोजचा प्रवास करत असताना अचानक अशा काही घटना घडतात की त्यातून आपल्याला अनोळखी माणसांसोबत बोलायचा प्रसंगही येतो. त्यानंतर सगळी औपचारिकता, शिष्टाचार बाजूला ठेवून अगदी मनमोकळेपणानं ऐसपैस बोलणं होतं. मग कालांतराने मनं जुळली की घट्ट मैत्री व्हायला वेळ लागत नाही... आणि नंतर कधी आपसात ऋणानुबंध जुळले हे आपलं आपल्याही कळत नाही! 

       ‘पुणे मेट्रो’ कादंबरीमध्ये नायक, नायिका आणि तिचे वडील ही तीनच मुख्य पात्रे असून त्यांच्याभोवतीच या कादंबरीचं कथानक फिरत राहतं… मग त्यांच्यामधील प्रभावी संवाद वाचताना जसजसं कथानक पुढे सरकते तसतशी वाचकांची उत्कंठा शिगेला पोहचल्याशिवाय राहत नाही! खरं तर हेच या कादंबरीचं सामर्थ्य आहे. त्यासाठी ‘चलना ही जिंदगी है… चलती ही जा रही है!’... हे जीवनाचं सरळ साधं तत्त्वज्ञान सांगणारी आणि त्यातून सकारात्मक संदेश देणारी ‘पुणे मेट्रो’ कादंबरी मुळात सगळ्यांनी वाचायलाच हवी! 

       मित्रवर्य लेखक सुनील पांडे यांचं निरीक्षण अफाट असल्यामुळे कथानकाची गुंफण आणि त्यातील प्रसंगांना कशाप्रकारे आणि कुठं ट्विस्ट द्यावं हे त्यांना छान जमते. म्हणूनच अगदी रोजच्या व्यवहारातील प्रसंग, कमीत कमी पात्र, अतिशय उत्तम आशय आणि मनाचा ठाव घेणारी प्रभावी संवाद शैली हे त्यांच्या कादंबरीचं खास वैशिष्ट्य ठरतं! विशेष म्हणजे कुठल्याही अलंकारिक भाषेचा आणि बोजड शब्दांचा आधार न घेता सरळसाध्या, सोप्या भाषेचा वापर ते करत असल्याने त्यांच्या साहित्यकृती नेहमीच वाचनीय ठरतात! 

      कथा, कादंबरी, चरित्र, व्यक्तीचित्रण इत्यादी सर्वच प्रकारात दर्जेदार आणि वाचनीय साहित्य लेखन करणाऱ्या सुनील पांडे यांना भावी वाटचालीसाठी भरभरून शुभेच्छा! धन्यवाद!

...विनोद श्रा. पंचभाई, पुणे 

   मो. क्र.९९२३७९७७२५

कादंबरीचे नाव... पुणे मेट्रो 

 एकूण पाने... १४८

किंमत ... २६५ रुपये 

लेखक... सुनील पांडे, पुणे 

प्रकाशन ... नवचैतन्य प्रकाशन, मुंबई