पुरावे..

पुरावे...

सांगा मित्रांनो ...
आता मी नेमके काय करावे?
जवळचेच लोक मागतात
माझ्या जिवंतपणाचे पुरावे..।

ज्यांच्यासाठी मरमर मरावे
अन् दुष्काळात पाणी भरावे
तेच आज मागतात..
माझ्या कर्तृत्वाचे पुरावे..।

या स्वार्थी दुनियेत सारेच शहाणे
आणि आपण अडाणी ठरावे.!
आपल्या प्रामाणिकपणाचे
कुठून देऊ मी यांना पुरावे..?

या तथाकथितांसमोर ...
ओरडून घसा मी किती खाकरावे..
या खोटारड्यांपुढे सत्याचे
मी देऊ कसे पुरावे...?

स्वत्व विकून ज्यांनी कीर्तीरुपे उरावे
अशा पांढरपेशांंना...
मम शरीरात आहे आत्मा,
याचे देऊ कसे पुरावे...?

एकमेकांविषयींचे नाते
हे खरंच विश्वासाचे ठरावे..।
मग कोणी मागणार नाही
कुणाला जीवघेणे पुरावे..!

           ..... विनोद श्रा. पंचभाई😇